Anastasiia Berezovska, 39 vjeçe, shtetase ukrainase, është shpallur në kërkim ndërkombëtar nga Interpol si e dyshuara kryesore për atentatin me bombë ndaj biznesmenit ukrainas Vadym Yermolaiev në Monako. Sipas autoriteteve, ajo dyshohet se vendosi dhe aktivizoi me telekomandë mjetin shpërthyes në hyrje të pallatit ku jetonte biznesmeni me partneren dhe djalin e tyre 13-vjeçar. Të tre mbetën të plagosur dhe vijojnë të marrin trajtim mjekësor.
Hetimet kanë rindërtuar edhe itinerarin e arratisjes së saj. Pas shpërthimit, Berezovska u largua në këmbë drejt Beausoleil, në territorin francez, ku e priste një automjet me targa gjermane. Më pas ajo kaloi kufirin në Ventimiglia, përshkoi Italinë, vijoi drejt Zvicrës dhe në fund mbërriti në Gjermani. Automjeti u gjet gjatë një kontrolli në landin Hessen, ndërsa në banesën e saj policia gjermane sekuestroi prova që tashmë i janë dorëzuar hetuesve të Monakos.
Sipas prokurorisë, identifikimi i saj u bë falë pamjeve të kamerave të sigurisë dhe dëshmisë së një personi që e pa mbrëmjen e atentatit. Hetuesit dyshojnë se gruaja ishte maskuar me kapele dhe veshje mashkullore për të fshehur identitetin gjatë vëzhgimeve që kishte kryer ditët para sulmit. Ajo kishte marrë me qira automjetin në Gjermani dhe, sipas autoriteteve, kishte qëndruar për disa ditë në Monako për të planifikuar atentatin.
Autoritetet gjermane kanë zhvilluar kontrolle në banesën e saj me mbështetjen e forcave speciale, por Berezovska nuk është gjetur. Sipas disa burimeve hetimore, ajo është parë së fundmi në zonën e Frankfurtit, ndërsa kërkimet për arrestimin e saj vazhdojnë. Motivi i atentatit mbetet ende nën hetim.
