Presidenti amerikan Donald Trump shfrytëzoi fjalimin e mbajtur në Mount Rushmore, në prag të 250-vjetorit të Pavarësisë së Shteteve të Bashkuara, për të sulmuar kundërshtarët politikë dhe për ta kthyer ceremoninë në një mesazh të fortë elektoral për zgjedhjet e mesmandatit në nëntor.
Trump deklaroi se kërcënimi më i madh për SHBA-në nuk vjen nga jashtë, por nga “radikalët dhe ekstremistët e brendshëm”, duke identifikuar komunizmin si rrezikun kryesor për identitetin amerikan. Ai sulmoi demokratët socialistë dhe paralajmëroi se vendi “nuk do të jetë kurrë një shtet komunist”.
Në fjalimin e tij, presidenti e cilësoi komunizmin si një ideologji që ka shkaktuar më shumë vdekje dhe shkatërrim se çdo sistem tjetër në histori, duke pretenduar se ai përbën një kërcënim më të madh për Amerikën sesa Lufta e Parë Botërore, Lufta e Dytë Botërore, sulmi në Pearl Harbor apo atentatet e 11 shtatorit.
Trump u bëri gjithashtu thirrje republikanëve të fitojnë zgjedhjet e mesmandatit dhe kërkoi nga Kongresi miratimin e Save America Act, ligj që, sipas tij, do të mbrojë procesin zgjedhor. Në fund të fjalimit ai deklaroi se “mund të jesh besnik ndaj Karl Marx-it ose ndaj Amerikës, mund të jesh komunist ose patriot, por nuk mund të jesh të dyja njëkohësisht”.
