Kryetari i Kuvendit, Niko Peleshi po zhvillon këto kohë një axhendë intensive të asaj që e quan diplomaci parlamentare, duke bindur Evropën se jemi ashtu siç thotë Edi Rama, e jo siç qytetarët artikulojnë në sheshe.
Deri këtu, asgjë e pazakontë.
Por të mos i bashkoheshin në këto ekskursione për leksione demokracie edhe deputetët e Partisë Demokratike.
Nga Austria, në Estoni, nga Greqia në Lituani, tani është koha për në Holandë.
Herë Besard Xhaferri e Klodiana Çapja, e herë Haxhinasto me shokë, nga turneu në turne, niveli i përfaqësimit të opozitës, është rritur.
Këto ditë, në Amsterdam, Niko Peleshin po e shoqërojnë vetë, Belind Këlliçi dhe Oerd Bylykbashi, të cilët po i japin një dorë Shqipërisë në rrugën e integrimit.
Udhëtojnë bashkë, eksplorojnë bashkë, shijojnë bashkë, dhe demokratizohen po bashkë.
Veçse fotot, i bëjnë veç.
Ndonëse kryetari i Kuvendit i shfaq të gjithë duke i përfshirë në mesazhin e tij, demokratët nuk e pranojnë hapur që ndajnë misionet me qeverinë, dhe aq më pak, nuk bëjnë transparencë se çfarë qëndrimesh mbajnë në emër të shqiptarëve, kur ulen në këtë tryeza ndërkombëtare.
Pasi jetojnë turnetë e demokracisë ku marrin leksione edhe për përfshirjen e opozitës në procese, vijnë në seancat e së enjtes, damkosin njëri-tjetrin dhe ankohen për vrasje të hapësirave të opozitës.
