Në Kuvend, Partia Demokratike në vend që të luftojë për shqyrtimin e 4 nismave të saj që lidhen drejtpërdrejt me kërkesat e protestuesve (si ligji për investimet strategjike, për zonat e mbrojtura, paketën e maleve dhe trashëgimninë kulturore), ka vrapuar të hapë debate të reja që nuk ju japin zë protestuesve dhe krijojnë narrativa që në fund nuk kanë asnjë produkt tjetër, vec protagonizmit të atyre që do të të zhvillojnë interpelancën.
Kështu, deputetja demokrate Jorida Tabaku që me ngazëllim u shfaq në shesh pasi ju dha leje Sali Berisha, mendon se është pikërisht tani momenti që koha parlamentare dhe mikroni të përdoren për të vënë në vështirësi ministrin e Financave, Petrit Malaj.
Çështjet kryesore që ngrihet nga Tabaku është mosrealizimi i shpenzimeve publike.
“Edhe pse ka një suficit buxhetor shumë të lartë (rreth 550 milionë euro për periudhën Janar–Prill 2026), kjo vjen si pasojë e mosrealizimit të shpenzimeve publike të planifikuara (vetëm 95.1% e planit)”,-thuhet në kërkesën për interpelancë.
Në një kënd tjetër, deputeti i Elbasanit, Bledi Himçi është kujtuar pikërisht tani, për bypassin e Elbasanit.
Akuzohet qeveria për dështim dhe vonesa në zgjidhjen e trafikut mbytës në hyrje-daljet e qytetit të Elbasanit.
”Trafiku kronik prek mijëra qytetarë, biznese dhe udhëtarë që lëvizin drejt Jugut, Juglindjes (Korçë, Pogradec) apo Maqedonisë së Veriut, duke sjellë humbje kohe dhe rritje të kostove të karburantit”.
Sikur ky problem mbiu pikërisht sot.
Interpelanca e tretë kërkohet nga grupi i PD dhe ka një lidhje më të afërt me protestën, edhe pse jo të drejtpërdrejtë, sepse lidhet me sistemin shëndetësor dhe me arsyet që ngrenë në shesh ata që flasim apo mbajnë pankarta.
Kritikohet gjendja e sistemit shëndetësor publik, i cili vuan nga mungesa e investimeve, organizimit dhe një vizioni afatgjatë.
Demokratët listojnë një sërë problemesh, si:
Infrastrukturë "primitive" dixhitale: Mjekët në QSUT dhe spitalet rajonale vazhdojnë të punojnë pa një infrastrukturë moderne.
Mungesa e EMR: Nuk ekziston një sistem kombëtar funksional i kartelës elektronike mjekësore (EMR), gjë që sjell fragmentim të të dhënave mes spitaleve dhe mjekëve të familjes. Mungojnë gjithashtu regjistrat kombëtarë klinikë dhe koordinimi efektiv.
Dhe fundi është i qartë. PS do të bëjë sikur do të japë llogari, e PD sikur lufton për qytetarët, ndërsa sheshi i qytetarëve i refuzon të dy, duke i detyruar të rrinë cepave të saj.
