Kryetari i Kontrollit të Lartë të Shtetit, Arben Shehu, ka ngritur shqetësimin se prej gati dy vitesh institucioni që ai drejton nuk ka akses në të dhënat e Agjencisë Shtetërore të Kadastrës, duke kërkuar ndërhyrjen e Kuvendit për rikthimin e bashkëpunimit ndërinstitucional.
Gjatë raportimit në Komisionin Parlamentar të Ekonomisë, Shehu deklaroi se mungesa e aksesit pengon kryerjen e auditimeve në një sektor me rëndësi të veçantë si ai i pronave. Sipas tij, transparenca në regjistrimin e pronave dhe garantimi i informimit të qytetarëve janë detyrime ligjore që duhet të respektohen.
Kreu i KLSH-së theksoi se problematikat në fushën e pronësisë kërkojnë monitorim të vazhdueshëm, duke përfshirë si pronat shtetërore ashtu edhe ato private. Ai bëri të ditur se janë depozituar edhe kallëzime lidhur me çështje që lidhen me ASHK-në, por nënvizoi se zgjidhja duhet të shkojë përtej rasteve individuale penale.
Situata e bllokimit institucional përkon me periudhën e drejtimit të ASHK-së nga Lorena Goxhobelli. Gjatë kësaj kohe janë shtuar denoncimet dhe debatet publike mbi çështjet e pronësisë, veçanërisht në zonat bregdetare. Vetëm në Kadastrën e Vlorës janë zëvendësuar të paktën 10 drejtues, ndërsa autoritetet nuk kanë dhënë shpjegime publike për këtë situatë.
Ndërkohë, hetimet e fundit të SPAK, kanë zbuluar një sërë tjetërsimesh pronash që trafikantët e lëndëve narkotike kanë përvetësuar.
Çështja e pronave është evidentuar edhe në raportin e fundit të Parlamentit Europian për Shqipërinë, ku kërkohet adresimi i abuzimeve, sidomos në zonat bregdetare dhe në rastet që prekin të drejtat e pronësisë së minoriteteve.
