Në Gjykatën e Posaçme po zhvillohet procesi ndaj kryebashkiakut të Tiranës, Erion Veliaj, dhe të pandehurve të tjerë. Veliaj nuk është paraqitur në seancë dhe, përmes një deklarate, i bën me dije gjykatës se: “Kam dijeni për seancën. Nuk dëshiroj të marr pjesë, pasi nuk më janë vënë në dispozicion 24 fashikujt dhe provat digjitale”.
Po sipas Veliajt, gjykata nuk ka zbatuar dispozitën ligjore për ta nxjerrë nga kafazi prej xhami. “Kjo më jep të drejtë të marr pjesë si njeri i lirë në sallën e gjyqit”, shkruante kryebashkiaku.
Në vijim të seancës, Plarent Ndreca deklaroi se: “Ashtu si relatuat, z. Veliaj ka deklaruar se ende nuk i janë vënë në dispozicion të gjitha aktet. Bëhet fjalë për akte për të cilat ju morët vendim që t’i viheshin në dispozicion”.
“Për të qenë të sinqertë, në orën 15:30 u njoftuam nga sekretaria gjyqësore se janë dorëzuar aktet. Veliajt duhet t’i lihet koha e nevojshme të njihet me to, për të pasur mundësinë e një mbrojtjeje efektive”, tha Ndreca.
Prokurori Olsi Dado deklaroi se aktet procedurale, për të cilat vendosi gjykata, u përkasin të pandehurve të tjerë.
Gjykata vendosi të vijojë seancën, duke theksuar se vënia në dispozicion e akteve të kërkuara, për nga natyra e tyre, nuk përbën shkak për ndërprerjen apo shtyrjen e seancës.
