Këshilli i Lartë Gjyqësor (KLGJ) vendosi të pezullojë nga detyra për një periudhë 6-mujore gjyqtaren e Shkodrës, Arta Llazari. Inspektori i Lartë i Drejtësisë (ILD) kishte kërkuar shkarkimin e saj për shkelje të rënda disiplinore gjatë ushtrimit të detyrës.
Sipas ILD-së, gjyqtarja ka kryer veprime dhe mosveprime që përbëjnë mos përmbushje të rregullt të detyrës, përfshirë shkelje të afateve procedurale civile dhe penale, vonesa në arsyetimin e vendimeve gjyqësore dhe mosveprim për çështje civile për periudha të tejzgjatura. Në shumë raste, dosjet gjyqësore kanë mbetur pa veprim për mbi tre vite.
Hetimi disiplinor ndaj magjistrates nisi bazuar në 11 ankesa për shkelje të afateve procedurale dhe vonesa të gjykimeve. ILD konstatoi se për vitin 2021, rreth 64% e çështjeve civile ishin jashtë afatit ligjor për arsyetim dhe dorëzim të vendimit, ndërsa për vitet 2022 dhe 2023 ky numër arriti në 90%.
Në raportin e hetimit theksohet se vonesat e tilla cënojnë të drejtën e qytetarëve për një proces të rregullt ligjor dhe dëmtojnë imazhin e drejtësisë. Për më tepër, veprimet e gjyqtares janë vlerësuar si neglizhencë e përsëritur dhe e vazhdueshme, duke shkaktuar dëm në procedurat hetimore.
Edhe pse me 24 vite përvojë në sistemin gjyqësor, Llazari është akuzuar për mungesë disipline dhe shkelje të detyrimeve profesionale, duke ndikuar negativisht në besimin e publikut te drejtësia.
