Holanda nuk do të marrë pjesë në Eurovision 2027. Vendimi është njoftuar nga transmetuesi publik holandez AVROTROS, i cili ka deklaruar se konkursi “nuk mund të konsiderohet më neutral”, për sa kohë një vend pjesëmarrës është ende i përfshirë në një konflikt të madh ushtarak.
Sipas AVROTROS, tensionet gjeopolitike në Lindjen e Mesme dhe lufta në Gaza kanë ndikuar drejtpërdrejt në garën muzikore, duke e kthyer atë në një arenë përçarjeje. Transmetuesi holandez ka kërkuar prej kohësh nga Unioni Europian i Transmetimeve rregulla të qarta për pjesëmarrjen e vendeve të përfshira në konflikte ushtarake.
Vendimi vjen pas bojkotit të Eurovision 2026 nga disa vende, mes tyre Holanda, Spanja, Irlanda, Islanda dhe Sllovenia, në shenjë proteste ndaj pjesëmarrjes së Izraelit. Organizatorët e Eurovision kanë njoftuar së fundmi disa ndryshime në rregulla, përfshirë kufizime për vendet e përfshira në konflikte që të mos mund të presin konkursin, por AVROTROS thotë se këto masa nuk mjaftojnë për të rikthyer besimin te karakteri i pavarur dhe neutral i festivalit.
Eurovision 2027 pritet të mbahet në Bullgari, ndërsa tërheqja e Holandës e thellon krizën politike që prej vitesh po shoqëron një konkurs që zyrtarisht synon të mbetet jashtë politikës.
