Ish-presidenti i Republikës, Ilir Meta, ka reaguar pas vendimit të sotëm të Gjykatës së Posaçme kundër Korrupsionit dhe Krimit të Organizuar (GJKKO), e cila vendosi të lërë në fuqi masën e sigurisë “arrest me burg” ndaj tij.
Meta, i cili ndodhet në paraburgim që prej tetorit të vitit të kaluar, ka shpërndarë një reagim në faqen e tij zyrtare në Facebook, ku sulmon fort drejtësinë dhe akuzat e ngritura ndaj tij, të cilat i cilëson “qesharake”. Ai paralajmëron se çështja e tij do të përfundojë në Gjykatën Evropiane për të Drejtat e Njeriut në Strasburg, ndërsa akuzon SPAK dhe mazhorancën për regji politike ndaj tij.
“Asnjë çudi nga drejtësia me regji ku SPAK përgjon gjykatat dhe ku afërmendsh akuzat formulohen nga tribunat e ‘Rilindjes’.
Ne do ta çmontojmë këtë farsë hap pas hapi dhe do ta shpartallojmë në Gjykatën e Strasburgut por edhe në debatin publik”, shkruan Meta.
Në të njëjtin postim, ish-kreu i shtetit bën me dije se sot në orën 17:30 do të dalë në publik Sekretari i Përgjithshëm i Partisë së Lirisë, Tedi Blushi, i cili do të paraqesë “argumentet kryesore kundër pretendimeve të akuzës”.
Gjithashtu, Meta njofton se nesër në orën 11:00, përmes një lidhjeje telefonike me z. Blushi, do të mbajë një konferencë për shtyp me gazetarët, ku do t’u përgjigjet drejtpërdrejt pyetjeve të tyre.
“Nuk ka fuqi që i mbyt të vërtetat e Ilir Metës dhe kauzat e Partisë së Lirisë”, përfundon deklarata e ish-Presidentit.
Ilir Meta ndodhet në paraburgim për një sërë akuzash të ngritura nga SPAK, përfshirë korrupsionin pasiv të funksionarëve të lartë, pastrim parash dhe shpërdorim detyre, ndërkohë që vetë ai i ka konsideruar akuzat si të motivuara politikisht dhe pjesë të një “skenari të qeverisë”.
