Drejtuesja e Byrosë Kombëtare të Hetimit, Aida Hajnaj Veizaj, po tenton të krijojë një ngërç artificial, me qëllim të riemërohet në këtë detyrë edhe për një mandat tjetër 5-vjeçar. Përmes një shkrese dorëzuar pranë SPAK për dijeni Këshillit të Lartë të Prokurorisë, znj. Hajnaj kërkonte të informohej lidhur me përbërjen e komisionit në SPAK, që bën dhe vlerësimin e kandidatëve. Ndërsa këmbëngul se riemërimi për të duhet të bëhet në mënyrë automatike.
Për këtë çështje, VNA iu drejtua Prokurorisë së Posaçme Kundër Korrupsionit dhe Krimit të Organizuar për të marrë reagim lidhur me procedurën që do të ndiqet për zgjedhjen e drejtuesit të ri të Byrosë Kombëtare të Hetimit.
SPAK vetëm pak ditë më parë njoftoi nisjen e procedurës së riemërimit të Drejtorit aktual të Byrosë Kombëtare të Hetimit (BKH).
Thënë ndryshe, ligji e detyron SPAK që t’i japë mundësinë zonjës Hajnaj të riemërohet në të njëjtin pozicion, nëse ajo shpreh interes, dhe për këtë arsye, bazuar në dispozitat ligjore, me urdhrin nr. 11794, datë 07.04.2025, Drejtuesi i Prokurorisë së Posaçme ngriti Komisionin e Përzgjedhjes. Ky komision, sipas njoftimit, është përbërë nga z. Altin Dumani (Drejtues i Prokurorisë së Posaçme) dhe prokurorët e posaçëm z. Arben Kraja dhe z. Behar Dibra.
Në përgjigje të kërkesës për informacion, SPAK sqaroi se “Fillimisht, Komisioni shqyrton kërkesën për riemërim të Drejtorit aktual të BKH-së, i cili i nënshtrohet të gjitha fazave të përcaktuara nga ligji nr. 95/2016, përfshirë:
• Shqyrtimin e aplikimit;
• Testin e arsyetimit logjik;
• Test me shkrim;
• Intervista;
• Kontrollin mjekësor;
• Testin e aftësive fizike;
• Verifikimin e figurës, deklarimin e aseteve dhe testin e poligrafit”.
Ne rastin e shprehjes se interesit nga zonja Hajnaj, kjo e fundit duhet t'i nënshtrohet të gjitha fazave të procesit.
“Ky proces zhvillohet vetëm për Drejtorin në detyrë. Pas vlerësimit të kalimit të Drejtorit në detyrë të të gjitha fazave më lart, Komisioni vlerëson nëse kandidati përmbush kriteret e parashikuara në nenet 34 dhe 38 të ligjit nr. 95/2016. Nëse ai nuk i kalon me sukses këto faza, atëherë Komisioni i Përzgjedhjes e konsideron të mbyllur procesin e ‘riemërimit’ dhe shpall garën për përzgjedhjen e një Drejtori të ri të BKH-së”, përfundoi SPAK.
Pra ndërsa ligji e ka të shprehur qartë procedurën e riemërimit të drejtuesit të BKH-së, Aida Hajnaj zgjedh të gjejë artifica për të shmangur procedurën standart për të zgjatur në shkelje të ligjit mandatin e saj në krye të BKH. Tashmë mbetet të shihet se cilat do të jenë lëvzjet e SPAK për zgjedhjen e kreut të ri të BKH-së.
