Një përfaqësi nga ambasada e SHBA-së ka zhvilluar një takim në Gjykatën Kushtetuese. Burime të VNA bëjnë me dije se vizita në Gjykatën Kushtetuese ka ndodhur dy ditë më parë dhe të pranishëm në takim kanë qenë të gjithë anëtarët e kësaj gjykate.
Edhe pse kryetarja e Gjykatës Kushtetuese nuk ka publikuar asnjë rresht për këtë takim, qartas rikthimi i vëmendjes së ambasadës së SHBA-së drejt kësaj gjykate është i ngjashëm me lëvizjen që ndodhi edhe në SPAK. Pas një periudhe tranzicioni, tashmë duket qartë se SHBA-ja është rikthyer me vëmendjen dhe asistencën e saj në SPAK dhe në Gjykatën Kushtetuese.
Në këtë të fundit, sigurisht, për t’i dhënë drejtim paqartësive për përfundimin e mandatit të dy anëtarëve të kësaj gjykate, përfshirë dhe kryetaren Holta Zaçaj, mandati i së cilës ka përfunduar dhe priten lëvizjet e Këshillit të Lartë të Drejtësisë për të nisur zyrtarisht procedurën për zëvendësimin e saj. Me të njëjtin ritëm pritet të zëvendësohet dhe anëtarja me mandat të përfunduar, Sonila Bejtja.
