Prokuroria e Korçës kërkon ndihmë jashtë vendit për të zbardhur vrasjen e Egli Progës gushtin e 2024 në Pogradec. Burime të besuara bënë me dije se prokurorja e çështjes ka vendosur të dërgojë për ekspertim jashtë vendit kamerat e sigurisë së lokal “Stropckës”, ku nisi përplasja mes Denis Meçes, të dyshuarit kryesor dhe Egli Progës.
Laboratorët dhe ekspertët brenda vendit nuk kanë mundur të rikthejnë pamjet filmike të lokalit në pronësi të Leonidha Guçes, ndaj e vetmja zgjidhje është dërgimi në një laborator të specializuar jashtë vendit. Rikthimi i pamjeve filmike do të zbardhte tej cdo dyshimi ngjarjen dhe dinamikën e saj. Denis Meçe, të cilit iu komunikua pak ditë më parë akuza e vrasjes me dashje ka deklaruar se Proga është goditur brenda lokalit edhe nga Leonidha Guçe, ndërsa ky i fundit e kundërshton këtë fakt.
Dëshmitari kryesor Andi Shkulaku në çdo rast ballafaqimi mes të dy të dyshuarit ndryshon qëndrim. E vetmja mundësi që prokuroria të kuptojë çfarë ndodhi me Progën është rikthimi i pamjeve. Të vetmen pamje që ka deri më tani në duar janë ata jashtë lokalit ku ai bie dhe përplaset pas një automjeti dhe humbet më pas dhe jetën.
Për vrasjen e Egli Progës deri më tani janë marrë të pandehur, Denis Meçe për akuzën e vrasjes, ndërsa Leonidha Guçe, Voltan Shkullaku dhe Arjan Manellari, akuzohen për moskallëzim krimi dhe veprime që pengojnë zbardhjen e së vërtetës. Së fundmi u arrestua dhe Andi Shkulaku.
