Biznesmeni shqiptar Ermal Beqiri, i kërkuar nga drejtësia shqiptare në kuadër të hetimeve për tenderat publikë, do të vazhdojë të qëndrojë në burg në Francë.
Gazeta franceze Le Courrier Picard raporton se Gjykata e Apelit në Amiens ka rrëzuar këtë të premte, më 23 tetor, kërkesën e tij për lirim nga paraburgimi.
Sipas gazetarit Gautier Lecardonnel, Beqiri është paraqitur sërish përpara gjykatës, tri ditë pasi Dhoma e Hetimit kishte shqyrtuar kërkesën e tij për lirim. Gjyqtarët vendosën ta refuzojnë atë, duke e lënë biznesmenin shqiptar pas hekurave deri në marrjen e një vendimi për ekstradimin e mundshëm drejt Shqipërisë.
Po këtë të premte, Dhoma e Hetimit në Amiens ka shqyrtuar edhe themelin e kërkesës së ekstradimit të paraqitur nga autoritetet shqiptare.
Beqiri, pronar i kështjellës së Berneuil-en-Bray në departamentin francez Oise, ishte arrestuar në fund të korrikut në Méaulte, pranë Albertit, pasi kishte fluturuar me avionin e tij mbi centralin bërthamor të Penly, në Seine-Maritime.
Ai kërkohet nga drejtësia shqiptare në lidhje me një hetim për kontrata publike, ndërsa procedura e ekstradimit vijon përpara autoriteteve gjyqësore franceze.
