Gjykata Kushtetuese ka vendosur të kalojë për shqyrtim në seancë kërkesën e magjistratëve lidhur me pagat e gjyqtarëve dhe prokurorëve.
Kërkesa lidhet me mënyrën e përllogaritjes së pagave dhe zbatimin e dispozitave ligjore që rregullojnë trajtimin financiar të magjistratëve.
Shoqata Kombëtare e Gjyqtarëve, Unioni i Gjyqtarëve dhe Shoqata e Prokurorëve kanë kundërshtuar formulën e re të pagave të miratuar nga Kuvendi, duke kërkuar pezullimin dhe shfuqizimin e saj.
Sipas magjistratëve, paga referuese duhet të lidhet me pagën e një funksionari të lartë të administratës publike, e cila indeksohet periodikisht, dhe jo me pagën e Presidentit të Republikës.
Formula e miratuar nga mazhoranca parashikon një rritje prej rreth 8 500 lekësh të pagës referuese. Megjithatë, gjyqtarët dhe prokurorët pretendojnë se, bazuar në vendimmarrjen e mëparshme të Gjykatës Kushtetuese, rritja duhet të jetë të paktën 80 mijë lekë.
Me kalimin e çështjes në seancë gjyqësore, Gjykata Kushtetuese do të shqyrtojë pretendimet e magjistratëve dhe përputhshmërinë e formulës së re të pagave me Kushtetutën.
