Një fytyrë e zbehtë, lëkurë pa shkëlqim dhe rrathë të errët poshtë syve. Në TikTok dhe rrjete të tjera sociale, këto shenja po lidhen gjithnjë e më shumë me një term të ri: “ferritin face”.
Ideja që po qarkullon në internet është se fytyra mund të tregojë kur rezervat e hekurit në organizëm janë të ulëta.
Por ekspertët paralajmërojnë se situata nuk është kaq e thjeshtë.
“Ferritin face” nuk është një diagnozë mjekësore dhe pamja e fytyrës, e vetme, nuk mund të tregojë nëse një person ka mungesë hekuri.
Ferritina është një proteinë që ruan hekurin në organizëm dhe niveli i saj në gjak përdoret nga mjekët për të ndihmuar në vlerësimin e rezervave të hekurit.
Kur rezervat bien ndjeshëm, mund të zhvillohet mungesa e hekurit dhe, në disa raste, anemia nga mungesa e hekurit.
Simptomat mund të përfshijnë lodhje, mungesë energjie, marrje fryme, rrahje të ndjeshme të zemrës, dhimbje koke dhe zbehje të lëkurës.
Pikërisht zbehja është një nga arsyet pse trendi “ferritin face” tingëllon bindës.
Por rrathët poshtë syve, fytyra e lodhur apo lëkura më e zbehtë mund të lidhen me shumë faktorë të tjerë, nga mungesa e gjumit dhe stresi deri te gjenetika apo probleme të tjera shëndetësore.
Problemi bëhet më serioz kur diagnozat e bëra në TikTok shoqërohen me trajtime të kushtueshme.
The Guardian raporton se në rrjete po promovohen edhe infuzione hekuri, të cilat në klinika private mund të kushtojnë qindra paund.
Ekspertët paralajmërojnë se hekuri nuk është një suplement që duhet marrë në mënyrë të pakontrolluar vetëm sepse dikush mendon se duket i zbehtë.
Nivelet e hekurit dhe ferritinës mund të kontrollohen përmes analizave të gjakut dhe, nëse konfirmohet mungesa, duhet kërkuar edhe arsyeja pse ka ndodhur.
Trajtimi mund të përfshijë ndryshime në ushqyerje, suplemente hekuri ose, në raste të caktuara dhe nën mbikëqyrje mjekësore, trajtime të tjera.
Mungesa e hekurit është reale dhe mund të shkaktojë probleme serioze nëse nuk trajtohet.
Ajo që nuk është reale si diagnozë mjekësore është “ferritin face”.
Dhe pikërisht këtu qëndron rreziku i trendit: një simptomë që mund të kërkojë analizë mjekësore po reduktohet në një kontroll të fytyrës para pasqyrës apo kamerës së telefonit.
Nëse TikTok-u të bind se fytyra jote po të tregon se ke mungesë hekuri, përgjigjen nuk e jep selfie-ja. E jep analiza e gjakut.
