Gjykata Evropiane e të Drejtave të Njeriut në Strasburg ka dhënë vendimin për çështjen e ish-prokurorit Adnand Kosova kundër Shqipërisë, e lidhur me procesin e rivlerësimit dhe shkarkimin e tij nga detyra.
Kosova iu drejtua Strasburgut pasi Kolegji i Posaçëm i Apelimit ndryshoi vendimin e Komisionit të Pavarur të Kualifikimit, i cili më 20 dhjetor 2018 e kishte konfirmuar atë në detyrë. KPA vendosi më 13 mars 2020 shkarkimin e tij.
Në qendër të procesit të vettingut ishin çështje që lidheshin me deklarimin dhe burimin e pasurisë së prokurorit, veçanërisht me një apartament në Tiranë dhe shitjen e një apartamenti në Korçë.
Kosova kishte deklaruar se një pjesë e parave të përdorura për apartamentin në Tiranë vinte nga shitja e pronës në Korçë. KPK i kishte pranuar shpjegimet e tij dhe kishte vlerësuar se pasaktësitë e konstatuara nuk ishin të mjaftueshme për të sjellë shkarkimin nga detyra.
Vendimi i KPK-së u ankimua nga Komisioneri Publik, pas rekomandimit të Operacionit Ndërkombëtar të Monitorimit, ndërsa çështja përfundoi në KPA, e cila vendosi shkarkimin e Kosovës.
Pas këtij vendimi, ish-prokurori iu drejtua Gjykatës Evropiane të të Drejtave të Njeriut, duke kundërshtuar procesin që çoi në largimin e tij nga sistemi i drejtësisë.
Çështja “Kosova kundër Shqipërisë” u shqyrtua në Strasburg më 15 shtator 2026, ndërsa vendimi sjell një zhvillim të ri në një prej rasteve të kontestuara të procesit të vettingut në Shqipëri.
