Rruga Librazhd–Pogradec vijon të mbetet e bllokuar, ndërsa situata është përkeqësuar në zonën e njohur si “Arrat e Gurrës”, ku rrëshqitjet e tokës po vazhdojnë. Autoritetet presin një relacion nga Shërbimi Gjeologjik për të përcaktuar ndërhyrjet e nevojshme, ndërsa së shpejti pritet të mblidhet edhe Këshilli Teknik për të vendosur mbi zgjidhjen.
Një nga alternativat e diskutuara është ndërtimi i një rruge provizore paralel me hekurudhën, pasi ura në segmentin e dëmtuar ka degraduar plotësisht dhe asfalti ka çeduar, duke u konsideruar aktualisht i pariparueshëm. Ndërkohë, është pezulluar edhe puna për hapjen e by-pass-it provizor në anën e sipërme të rrugës ekzistuese, për shkak të rrezikut për jetën e punëtorëve.
Për Autoritetin Rrugor Shqiptar, rrëshqitja konsiderohet fenomen natyror i shkaktuar nga reshjet, por Prokuroria ka nisur hetime për disa vepra penale, përfshirë “Shpërdorim detyre”, “Shkelje të barazisë në tenderë”, “Shkatërrim të rrugës” dhe “Ndotje të mjedisit”, duke verifikuar nëse punimet për Korridorin VIII kanë ndikuar në destabilizimin e terrenit.
Loti i shtatë i autostradës është fituar nga kompania “ANK”, në pronësi të Agim Kolës, kantieri i së cilës ndodhet rreth 2 kilometra nga zona e shembjes. E njëjta kompani është kontraktuar edhe për hapjen e by-pass-it provizor.
Si pasojë e bllokimit, qytetarët e Korçës, Pogradecit, Përrenjasit dhe Librazhdit detyrohen të përdorin rrugën Maliq–Gramsh për të shkuar drejt Tiranës, një itinerar më i gjatë dhe me më pak siguri. Një alternativë tjetër, por më e vështirë, mbetet kalimi nga Tepelena dhe Leskoviku.
Në ditët në vijim pritet një vlerësim i thelluar tektonik dhe gjeodinamik i zonës, për të përcaktuar nëse territori paraqet rrezik të përhershëm për infrastrukturën.
