Skeleti i Shën Françeskut të Asizit po ekspozohet për herë të parë plotësisht për publikun, në një ngjarje që pritet të tërheqë qindra mijëra vizitorë nga e gjithë bota.
Eshtrat e shenjtorit të shekullit XIII po shfaqen në një kuti të mbushur me azot, me mbishkrimin latin “Corpus Sancti Francisci” (Trupi i Shën Françeskut), brenda Bazilikës së Shën Françeskut në qytetin kodrinor italian Asizi.
Shën Françesku, i cili ndërroi jetë më 3 tetor 1226, themeloi urdhrin françeskan pasi hoqi dorë nga pasuria dhe ia kushtoi jetën të varfërve. Sipas Giulio Cesareo, drejtor i komunikimit në konventën françeskane në Asizi, ekspozimi synon të jetë “një përvojë domethënëse” si për besimtarët ashtu edhe për jobesimtarët. Ai tha se gjendja e “dëmtuar” dhe “e konsumuar” e kockave dëshmon se shenjti “u dha plotësisht” misionit të tij.
Eshtrat do të qëndrojnë të ekspozuara deri më 22 mars. Trupi i tij u transferua në bazilikën e ndërtuar në nder të tij në vitin 1230, por varri u rizbulua vetëm në vitin 1818, pas gërmimeve të kryera në fshehtësi të plotë.
Përveç zhvarrosjeve për qëllime inspektimi dhe ekzaminimi shkencor, kockat e Shën Françeskut janë ekspozuar vetëm një herë më parë, në vitin 1978, për një audiencë shumë të kufizuar dhe vetëm për një ditë.
Kutia transparente që përmban reliket, e përdorur që prej vitit 1978, është vendosur brenda një strukture tjetër xhami antiplumb dhe kundër vjedhjes. Kamerat e sigurisë do të funksionojnë 24 orë në ditë për të garantuar mbrojtjen e eshtrave.
Shën Françesku është shenjti mbrojtës i Italisë dhe më 4 tetor do të rikthehet si festë zyrtare, në kuadër të 800-vjetorit të vdekjes së tij. Sipas autoriteteve françeskane, rezervimet për të parë reliket kanë arritur tashmë në rreth 400 mijë persona, kryesisht nga Italia, por edhe nga Brazili, Amerika e Veriut dhe Afrika.
Në këtë periudhë të vitit, bazilika zakonisht vizitohet nga rreth 1,000 persona në ditë gjatë javës dhe 4,000 në fundjavë. Për shkak të ekspozimit, pritet që numri të rritet në 15,000 vizitorë në ditët e javës dhe deri në 19,000 gjatë fundjavave.
Françeskanët theksojnë se ekspozimi i zgjatur nuk do të ndikojë në ruajtjen e eshtrave, pasi kutia është e mbyllur hermetikisht dhe nuk ka kontakt me ajrin e jashtëm. Ndriçimi në bazilikë do të mbetet i zbehtë për të shmangur çdo ndikim. “Bazilika nuk do të ndriçohet si një stadium. Kjo nuk është një set filmi,” u shpreh Cesareo.
