Banorët e prekur nga projekti “TID Durrës” kanë dalë me një deklaratë publike ku shprehin kundërshtimin ndaj mënyrës së zbatimit të projektit dhe alternativave të ofruara nga institucionet në Durrës.
Sipas tyre, projekti paraqet mangësi dhe shkelje procedurale, ndërsa kërkojnë shtyrje të afateve ligjore të ekzekutimit dhe pezullim të menjëhershëm të shembjeve. Në të kundërt, banorët paralajmërojnë përshkallëzim të protestave dhe intensifikim të reagimit publik dhe institucional, duke theksuar se komunikimet në nivel ndërkombëtar kanë nisur dhe do të vijojnë në mbrojtje të të drejtave të tyre dhe të parimeve të shtetit ligjor.
Në deklaratën e tyre, banorët bëjnë me dije se gjatë një takimi me përfaqësues institucionalë, përfshirë drejtues të qeverisë dhe të bashkisë, u është komunikuar se projekti do të realizohet pa ndryshime.
Sipas banorëve, alternativat e ofruara kanë qenë:
pranimi i një çmimi shpronësimi pak më të lartë;
zhvendosja në zona periferike të përcaktuara nga institucionet;
ose sistemimi i tyre në një objekt të vetëm të përzgjedhur nga bashkia.
Banorët kundërshtojnë këtë qasje, duke argumentuar se projekti përmban prona të papërfshira në listat e shpronësimit ose pa ekspertizë të saktë vlerësimi. Ata theksojnë se nuk mund të pranojnë zbatimin e një projekti me shkelje vetëm për faktin se është vendosur të realizohet.
Mes shqetësimeve të ngritura janë:
mungesa e dakordësimit me banorët për propozimet e paraqitura;
çmimi referencë i konsideruar si “çmim dysheme”;
nevoja që çdo zhvendosje të bëhet vetëm me dakordësinë e vetë banorëve;
mungesa e ofertave konkrete dhe të formalizuara deri më tani.
Banorët kërkojnë:
shtyrje të afateve ligjore të ekzekutimit të projektit;
pezullim të menjëhershëm të shembjeve;
shqyrtim ligjor të plotë të çdo rasti individual.
Në deklaratë theksohet se, nëse kërkesat nuk merren parasysh, ata do të përshkallëzojnë protestat dhe do të rrisin reagimin publik dhe institucional, duke vijuar edhe komunikimet në nivel ndërkombëtar.
