Organizata për Ruajtjen dhe Mbrojtjen e Natyrës në Shqipëri, PPNEA shprehet kundër ndërtimit të resortit “Blue Borgo”, të planifikuar në Baks–Rrjoll, brenda Peizazhit të Mbrojtur Bunë–Velipojë.
Ndërtimi i një resorti turistik nga kompania “Gener 2” në fshatin Baks-Rrjoll në Velipojë, u kundërshtuar të enjten nga organizata më vjetër medisore në vend, PPNEA, e cila nëpërmjet një deklarata u shpreh se projekti rrezikon të betonizojë një zonë të mbrojtur me rëndësi ndërkombëtare.
“Kjo nuk është një zonë e zakonshme zhvillimi. Lumi i Bunës – Velipojë është Zonë e Mbrojtur me ligj dhe njëkohësisht Ligatinë me Rëndësi Ndërkombëtare (Ramsar), zona më e madhe e kësaj konvente në Shqipëri,” tha PPNEA.
“Ky kompleks ligatinor është ndër më të pasurit dhe më të rëndësishmit në rajonin e Adriatikut për biodiversitetin dhe për ruajtjen e integritetit ekologjik të ekosistemeve bregdetare,” shtoi organizata.
Projekti “Blue Borgo”, që tashmë ka filluar punimet, konsiston në një resort turistik me 33 struktura akomodimi me nga 3 deri në 10 kate mbi tokë dhe 1 kat nëntokë.
Ky resort është planifikuar të ndërtohet brenda një harku kohor prej 60 muajsh nga kompania Gener 2, me statusin e investitorit strategjik. Projekti është kundërshtuar me forcë nga banorët vendas, të cilët protestojnë se pronat e tyre janë tjetërsuar nëpërmjet falsifikimit të dokumenteve.
Ndërkohë, kompania zhvilluese e projektit deklaron se ndjekur të gjithë hapat ligjorë për marrjen e lejes së ndërtimit dhe zhvillimin e zonës.
Sipas organizatës mjedisore, në këtë zonë strehohen qindra shpendë shtegtarë, përfshirë lloje të rrezikuara globalisht, duna bregdetare të paprekura, laguna, habitate të rralla dhe korridore ekologjike jetike për peshqit dhe gjitarët e egër.
“Çdo vit, shpendë dimërues gjejnë strehë në këtë ekosistem unik, duke e bërë këtë zonë një thesar natyror kombëtar dhe evropian,” theksoi ajo, ndërsa shtoi se zhvillimi i qëndrueshëm nuk mund të ndërtohet duke dobësuar statusin e mbrojtjes së një zone me vlera kaq të jashtëzakonshme natyrore.
“Mbrojtja e saj është një detyrim ligjor, kombëtar dhe ndërkombëtar,” përfundoi organizata./Reporter.al
