Protestë po zhvillohet këtë të enjte para Kuvendit, pak para nisjes së seancës plenare, ku janë mbledhur banorë nga Durrësi dhe nga zona e Rrjollit për të kundërshtuar projektet që sipas tyre prekin pronat e tyre.
Rreth 200 banorë dhe përfaqësues biznesesh që operojnë në bulevardin “Epidamn” në Durrës po protestojnë kundër prishjes së godinave ku ata ushtrojnë aktivitetin dhe jetojnë, në zonën ku pritet të zbatohet projekti “TID” nga Fondi Shqiptaro-Amerikan i Zhvillimit (AADF).
Banorët kundërshtojnë procesin e shpronësimeve, duke deklaruar se vlera e ofruar nga Bashkia e Durrësit është shumë më e ulët se çmimi real i tregut. Sipas tyre, në zonën e parkut arkeologjik çmimi i tregut arrin deri në 3000 euro për metër katror, ndaj kërkojnë kompensim sipas vlerës reale të tregut.
Më 10 shkurt, Bashkia e Durrësit i paraqiti Këshillit Bashkiak një projektvendim për miratimin e një bonusi qiraje për banorët e prekur nga projekti “TID”, por kjo nismë u kundërshtua fort nga pronarët e banesave dhe bizneseve, të cilët e konsideruan bonusin si të pamjaftueshëm. Për shkak të kundërshtimeve, këshilltarët e opozitës braktisën mbledhjen dhe projektvendimi nuk u miratua.
Njëkohësisht, para Kuvendit po protestojnë edhe banorët e Rrjollit, të cilët kundërshtojnë projektin e biznesmenit Bashkim Ulaj në zonën e Velipojës. Ata kanë ngritur pankarta dhe po thërrasin slogane si: “Larg duart nga pronat tona”.
