Deputeti i Partisë Socialiste, Erion Braçe, ka ngritur shqetësime lidhur me rritjen e çmimit të sigurimit të automjeteve, duke e cilësuar situatën si abuzim ndaj qytetarëve dhe dështim të institucioneve rregullatore.
Përmes një postimi në rrjetet sociale, Braçe shprehet se çdo ditë përballet me ankesa nga qytetarë që, pavarësisht se nuk kanë pasur aksidente, po paguajnë më shumë për policat e sigurimit. Ai sjell si shembull rastin e një qytetari, i cili i ka dërguar faturën e sigurimit që i ishte rritur me mbi 20 mijë lekë, edhe pse kishte një vit pa asnjë aksident.
Sipas deputetit, kjo situatë ishte paralajmëruar prej tij që në muajin nëntor. Braçe thekson se rregullorja e Autoritetit të Mbikëqyrjes Financiare (AMF) për faktorët e riskut është e shbalancuar në favor të kompanive të sigurimit dhe nuk shpërblen drejtuesit e mjeteve që respektojnë rregullat e qarkullimit.
Ai shton se gjendja rëndohet edhe më tej nga marrëveshje të ndaluara mes kompanive të sigurimit, të cilat, sipas tij, zhbëjnë çdo përpjekje rregullatore për mbrojtjen e konsumatorëve. Braçe bën të ditur gjithashtu se në Kuvend ka mësuar se rezolutat e Komisionit të Ekonomisë për AMF-në dhe Autoritetin e Konkurrencës janë hequr nga rendi i ditës, ndonëse synonin mbrojtjen e qytetarëve nga abuzimet e kompanive të sigurimit.
