Policia e Lezhës ka zbardhur detaje të reja lidhur me zjarrin që përfshiu një apartament pasditen e kësaj të shtune, në lagjen “Skënderbeg”, duke shkaktuar dëme materiale dhe probleme shëndetësore te disa banorë të pallatit.
Sipas njoftimit zyrtar të Policisë, ngjarja ka ndodhur rreth orës 16:30, në banesën e shtetasit A. L., ku dyshohet se zjarri është shkaktuar nga një cigare e lënë ndezur prej vetë pronarit.
Flakët kanë shkaktuar dëme materiale në apartament, ndërsa në vendngjarje kanë ndërhyrë shërbimet zjarrfikëse, të cilat kanë bërë të mundur shuarjen e zjarrit. Si pasojë e përhapjes së tymit, disa prej tyre kanë shfaqur shenja asfiksimi dhe janë transportuar në Spitalin Rajonal të Lezhës për ndihmë mjekësore. Sipas autoriteteve, të gjithë ndodhen jashtë rrezikut për jetën.
Në lidhje me ngjarjen, pronari i apartamentit, i identifikuar me inicialet A. L., është shoqëruar në Komisariatin e Policisë Lezhë, ku po kryhen veprimet procedurale.
Njoftimi i plotë i Policisë:
“Lezhë/Informacion paraprak.
Më datë 07.11.2026, rreth orës 16:30, në lagjen ‘Skënderbeg’, Lezhë, në banesën e shtetasit A. L., dyshohet se, si pasojë e një cigareje të lënë ndezur prej tij, ka rënë zjarr.
Si pasojë e zjarrit, janë shkaktuar dëme materiale në banesën e shtetasit A. L. Zjarri është fikur nga shërbimet e Zjarrfikëses.
Shërbimet e Policisë dhe të Zjarrfikëses kanë bërë të mundur evakuimin e banorëve të pallatit, duke parandaluar pasoja të mëtejshme.
Për shkak të tymit, disa shtetas, banorë të këtij pallati, kanë shfaqur shenja asfiksimi dhe janë transportuar në Spitalin Rajonal Lezhë, ku po marrin ndihmë mjekësore dhe ndodhen jashtë rrezikut për jetën.
Shtetasi A. L. është shoqëruar në ambientet e Komisariatit të Policisë Lezhë, ku po kryhen veprimet procedurale.
Grupi hetimor vijon punën për dokumentimin dhe sqarimin e plotë të rrethanave të ngjarjes.”
