Gjashtë persona kanë humbur jetën dhe të paktën 15 të tjerë janë plagosur pas një sulmi me armë zjarri në qendër të qytetit të Krakovit, në Poloni, këtë të shtunë.
Sipas raportimeve të BBC, viktimat janë katër gra dhe dy burra, ndërsa mes të plagosurve ndodhen edhe dy efektivë policie, njëri prej të cilëve është në gjendje shumë kritike.
Ngjarja ndodhi rreth orës 15:00, kur një person hyri me automjet në Sheshin Kryesor të Tregut dhe nisi të qëllonte në mënyrë të rastësishme ndaj qytetarëve, duke shkaktuar panik dhe kaos.
Autori i dyshuar, një shtetas polak i veshur me uniformë të stilit ushtarak, u qëllua nga policia gjatë ndërhyrjes dhe u transportua në spital. Sipas autoriteteve, ai përdori armë ushtarake, ndërsa në automjetin e tij u gjetën armë dhe municione të tjera.
Gjatë ngjarjes u qëllua edhe një tramvaj, por nuk pati të lënduar mes pasagjerëve. Policia ka bllokuar sheshin kryesor dhe rrugët përreth, ndërsa të plagosurit po marrin trajtim në spitalet e qytetit.
Kryeministri polak Donald Tusk e cilësoi ngjarjen tragjike dhe vlerësoi ndërhyrjen e policisë. Ndërkohë, autoritetet lokale kanë shpallur zi në Krakov deri më 11 nëntor.
Motivi i sulmit mbetet ende i panjohur, ndërsa policia ka konfirmuar se deri tani është identifikuar vetëm një autor i dyshuar. Hetimet për zbardhjen e plotë të ngjarjes vijojnë.
