Sali Berisha reagoi ashpër pas emërimit të Dash Sulës nga Edi Rama, duke e cilësuar këtë lëvizje si tradhti ndaj opozitës dhe idealeve demokratike.
Ai tha se tradhtia ndaj parimeve të demokracisë është po aq e rëndë sa tradhtia ndaj atdheut, duke akuzuar Sulën se në momentin më kritik zgjodhi të rreshtohej krah pushtetit.
“Të tradhtosh burra e gra që të kanë mbështetur për 12 vjet dhe të kapësh flamurin e Ramës në ditën e tij më të zezë, është akti më i lartë i tradhtisë,” deklaroi Berisha.
Ai e lidhi këtë edhe me rastin e Ervin Salianjit, duke e quajtur “mollë të kalbur” dhe shembull të kalimit në krahun e Ramës. Berisha përmendi gjithashtu një mjek nga Fieri që, sipas tij, thotë se është anëtar i PD-së, por mbështet Salianjin dhe kryebashkiakun socialist Armando Subashi.
Sipas Berishës, PD nuk humb nga largime të tilla, por pastrohet.
“Ne nuk duam në gjirin tonë shërbëtorë të Edi Ramës. Kush bëhet patericë e tij në momentin më të vështirë, shkruan histori turpi,” përfundoi ai.
