Elisa Spiropali nuk e ka nisur me këmbë të mbarë detyrën si kryeparlamentare, dhe kjo jo për shkak të sherrit të mbrëmshëm, skenë me të cilën ajo është mësuar edhe më parë. Mesa duket, padija apo keqdashja e kanë shtyrë të bëjë një veprim që mund të konsiderohet antikushtetues.
Në njoftimin e sotëm të Kuvendit për vendin vakant të anëtares së Gjykatës Kushtetuese, pas dorëheqjes së Elsa Toskës, zonja Spiropali ka shkruar se pasardhësi i saj do të ketë mandat deri në vitin 2028.
Në fakt, sipas ligjit, mandati i Toskës është deri në vitin 2025. Rregulli është që nëse gjyqtari largohet para kohe, ai që vjen do ta marrë mandatin për aq kohë sa ka mbetur nga pjesa e paplotësuar, pra deri në vitin 2025. Nuk është e pavend të mendohet se socialistët e kanë gjetur zëvendësuesin e zonjës Toska, pasi i kanë edhe votat për ta zgjedhur në parlament.
Thjesht, drejtuesja e Kuvendit të paktën duhet të jetë e qartë kur lexon dhe zbaton ligjet. Sepse Kushtetuta nuk është fjalim për të ngazëllyer shefin, por ligj që duhet zbatuar me përpikëri.
