Më 17 maj 1945, Pertefe Meta i dërgon një letër Enver Hoxhës, si kryeministër i Shqipërisë komuniste, duke kërkuar kthimin e shtëpisë së sekuestruar nga Ushtria Nacional-Çlirimtare dhe ndalimin e dëbimit të familjes së saj nga Komanda e Disiplinës së Tiranës. Në letër, Pertefe shprehet se është bashkëshortja e Rexhep Metës, banuese në Lagjen Xhamia Sherif në Tiranë, së bashku me fëmijën e saj. Pas arrestimit të Rexhep Metës, ushtria sekuestroi shtëpinë e tyre dhe ato kërcënoheshin me dëbim, si masë politike ndaj dënimit të tij.
Pertefe Meta, në letër, shkruan se shtëpia ishte blerë me paratë e shkrimtares së njohur amerikane, Rose Wilder Lane, e cila kishte kontribuar jashtëzakonisht në Shqipëri në emër të Rexhep (Rexh) Metës, djalit të saj të adoptuar, pasi në atë kohë të huajve nuk u lejohej të blinin prona të paluajtshme në Shqipëri.
Kalvari i familjes së Rexhep Metës vazhdoi me dënimin e tij me 27 vjet burg si armik i regjimit, ndonëse ai kishte qenë një patriot dhe biri i adoptuar i njërës prej grave më të njohura në aktivizmin e saj politik dhe civil në SHBA. Shkrimtarja Rose Wilder Lane, pas Luftës së Parë Botërore, u angazhua fuqishëm me Kryqin e Kuq Amerikan dhe erdhi në Shqipëri në vitin 1921, ku qëndroi me një mision humanitar. Ajo u angazhua në hapjen e shkollave civile për fëmijët shqiptarë, të cilët kishin mbetur jetimë pas Luftës së Parë Botërore. Gjatë qëndrimit të saj, Rose takoi Rexhep Metën, një djalosh 12-vjeçar jetim nga Mali i Zi, që ishte nxënës në shkollën e Kryqit të Kuq Amerikan në Tiranë. Ajo e birësoi Rexhën, një nxënës i shkëlqyer i shkollës amerikane, i cili në një nga udhëtimet e Rose në Alpet shqiptare i shpëtoi jetën nga rënia në greminë. Në këmbim të këtij përkushtimi, Rose e birësoi dhe e dërgoi për studime në Francë e më pas në Cambridge, ku ai përfundoi studimet me rezultate të shkëlqyera në ekonomi.
Për periudhën e saj në Shqipëri, Rose Wilder Lane shkroi librin "Peaks of Shala: Being a Record of Certain Wanderings among the Hill-tribes of Albania". Ndërkohë, Rexhep Meta, pas përfundimit të studimeve në Cambridge, u kthye në Shqipëri gjatë Luftës së Dytë Botërore, por më pas u internua në Itali si antifashist. Vuajtjet e tij dhe të familjes nuk morën fund. Në vitin 1945, ai u arrestua nga regjimi komunist dhe u dënua fillimisht me vdekje, por më pas dënimi iu ndryshua në 27 vjet burg. Megjithëse Rose Wilder Lane u përpoq gjatë gjithë jetës së saj për lirimin e tij, nuk arriti të ketë sukses. Vetëm pas rënies së komunizmit, djali tjetër i birësuar i saj arriti të bashkohej me mbesën e tij shqiptaro-amerikane, Bora Rose, vajza e Rexhep dhe Përtefe Metës.
