Kryeministri Edi Rama vendosi sot t’u përgjigjet kritikave për financimin e koncertit të Kanye West jo duke debatuar për shumën e shpenzuar apo për prioritetet e buxhetit, por duke shpjeguar se problemi është diku tjetër: te mënyra se si qytetarët e kuptojnë ekonominë.
Në një video të publikuar në rrjetet sociale, Rama i cilësoi reagimet si një “furi dhune dhe marrëzie”, ndërsa shtoi se pas tyre fshihet “një keqkuptim themelor mbi mënyrën se si zhvillohet një vend dhe se si rritet një ekonomi”.
Për kryeministrin, koncerti nuk ishte thjesht një koncert. “Shqipëria organizoi një ngjarje, që falë kanaleve sociale dhe famës globale të protagonistit, u bë në çdo cep të botës një lajm”, argumentoi ai, duke e paraqitur eventin si një investim në imazhin e vendit.
Më pas erdhi edhe leksioni: “Zhvillimi s’është një bukë me madhësi fikse ku çdo euro që ndahet për një koncert i hiqet një pensionisti, një të sëmuri apo një nxënësi. Zhvillimi është aftësia për ta bërë bukën më të madhe, që në ndarjen e saj më pas të ketë më shumë për të gjithë.”
Kështu, debati nuk është më nëse 4.3 milionë euro fonde publike duhej apo jo të shkonin për një koncert. Debati, sipas logjikës së kryeministrit, është nëse qytetarët e kanë kuptuar ende zhvillimin. Në vend që të shpjegojë pse ky ishte përdorimi më i mirë i parave publike, Rama shpjegon pse ata që e kundërshtojnë nuk e kuptojnë ekonominë.
Nga ky këndvështrim, pyetja “pse u shpenzuan kaq para për koncertin?” nuk është një debat mbi prioritetet. Është, sipas mesazhit të kryeministrit, një provë se një pjesë e publikut ende nuk ka arritur në nivelin e duhur të të kuptuarit të zhvillimit.
Dhe ndoshta ky ishte mesazhi më interesant i videos së sotme: jo të bindte qytetarët se qeveria kishte bërë zgjedhjen e duhur, por t’u shpjegonte se, nëse nuk bien dakord me të, problemi nuk është vendimi i qeverisë. Problemi është se ata nuk e kuptojnë ende ekonominë.
