Këtë të enjte, Parlamenti u mblodh për herë të parë pas protestave të dhunshme në kryeqytet. Në kulmin e krizës, pritej që Kuvendi të kishte në fokus situatën e krijuar, përgjegjësitë për atë që kishte ndodhur dhe mundësitë për një zgjidhje.
Por asnjëra nga palët nuk surprizoi për mirë. Socialistët kishin hallin të miratonin shpejt e shpejt rendin e ditës. Partia Demokratike iu kthye skenarit të vjetër e të konsumuar të bllokimit të foltores.
Kulmi ishte përplasja fizike, fillimisht mes Flamur Nokës dhe Taulant Ballës e më pas edhe mes deputetëve të tjerë.
Një seancë që duhej t’i kushtohej gjendjes së jashtëzakonshme në rrugët e kryeqytetit, i pati të gjitha, përveç shqetësimeve të qytetarëve. Sharje, shtyrje, grushte, deputetë të buzëqeshur dhe të tjerë që mezi prisnin të largoheshin.
PS e kaloi edhe këtë seancë pa u përballur me një debat për atë që po ndodh jashtë Kuvendit. Ndërsa opozita, që duhej ta kërkonte me këmbëngulje këtë përballje, prodhoi pamjet që e zhvendosën vëmendjen te sherri i radhës.
Çfarë fitojnë studentët nga bllokimi i foltores? Çfarë përgjigjeje morën familjet e të arrestuarve? Kujt iu kërkua llogari për dhunën?
Në fund, nga seanca mbetën pamjet e Nokës me Ballën. Pikërisht ato që do të përsëriten në ekran, duke lënë në hije arsyen përse qytetarët kanë dalë në rrugë.
Dhe kështu, Edi Ramës i erdhi edhe njëherë në ndihmë opozita, duke i dhënë shown-n që i duhej.
