Banori i Moskës, Yury Kokhovets, është dënuar me pesë vjet burgim për dënimin e pushtimit të Ukrainës nga Rusia gjatë një interviste në rrugë në korrik të vitit 2022 për një gazetar të Radios Evropa e Lirë (REL).
Gjykata e Qytetit të Moskës shpalli vendimin më 17 shtator, duke anuluar vendimin e një gjykate të shkallës më të ulët në prill, që dënonte Kokhovets me pesë vjet “punë të detyruar”.
Kokhovets u arrestua menjëherë pas shpalljes së vendimit.
Dënimi i përcaktuar si punë e detyruar në Rusi nënkupton që të dënuarit nuk vuajnë dënimin në burg, por në vend të kësaj, mund të zgjedhin të qëndrojnë në shtëpi dhe të dërgohen për të punuar në një objekt të afërt industrial, sipas përcaktimeve të Shërbimit Federal të Burgjeve.
Një pjesë e pagës së tyre u zbritet nga shteti.
Gjykata e Qytetit të Moskës, megjithatë, tha se e ndryshoi dënimin pasi e shpalli Kokhovets fajtor për “shpërndarje të informacioneve të rrejshme rreth ushtrisë ruse bazuar në urrejtje politike”.
Në korrik të vitit 2022, Kokhovets u pyet nga një gazetar i Radios Evropa e Lirë nëse mendonte se ishte e nevojshme një zbutje e tensioneve midis Rusisë dhe vendeve të NATO-s.
“Sigurisht që na nevojitet (shtensionimi), por gjithçka varet nga Qeveria jonë. Qeveria jonë është ajo që e ka nisur këtë… Është Rusia ajo që i ka krijuar të gjitha këto probleme,” kishte thënë Kokhovets për REL-in. “Unë nuk shoh asnjë problem me NATO-n, ajo nuk ka në plan të sulmojë askënd.”
Ai shtoi se forcat ruse kishin vrarë civilë në periferi të Kievit, në Buça “pa asnjë arsye”.
Moska mohon akuzat se ka kryer krime lufte në Ukrainë.
Kokhovets pranoi pjesërisht fajësinë, duke mohuar që deklaratat e tij gjatë intervistës me Radion Evropa e Lirë ishin të bazuara në urrejtje. Ai gjithashtu deklaroi në gjyq se po ushtronte të drejtën e tij kushtetuese për të shprehur lirshëm mendimin e tij gjatë bisedës me gazetarin e REL-it.
Gjatë seancës më 17 shtator, Kokhovets tha gjithashtu se nuk e dinte që të flisje me Radion Evropa e Lirë ishte shkelje e Kodit Penal dhe se nuk kishte ide që intervista e dhënë për REL-in do të publikohej në internet.
Avokatja e tij tha në gjyqin fillestar se klienti i saj nuk kishte urrejtje ndaj askujt kur foli për REL-in.
Sipas Yelena Sheremetyeva, “provat” e fajësisë së klientit të saj bazoheshin tërësisht në një ekzaminim gjuhësor forensik të fjalëve të tij, që sipas saj, ishte kryer me shkelje të rënda, përfshirë faktin që dy personat që studiuan deklaratat e tij nuk ishin gjuhëtarë të licencuar nga shteti.
Studimi forensik gjuhësor u krye nga mësuesja e matematikës Natalya Kryukova, dhe përkthyesi Aleksandr Tarasov, të cilët gjithashtu kryen ekzaminime të ngjashme gjuhësore në rastet e mbylljes së Qendrës për të Drejtat e Njeriut, Memorial, në vitin 2021, dhe burgosjes së bashkëkryetarit të Memorialit, Oleg Orlov, në shkurt të këtij viti./REL
