Donald Trump ka përjashtuar mundësinë e një debati tjetër presidencial me kundërshtaren e tij Kamala Harris para zgjedhjeve të nëntorit. Ai tha të enjten - dy ditë pas përballjes së parë mes tyre në Filadelfia - se Harris donte vetëm një përballje tjetër sepse ai "qartazi" kishte fituar. Disa anketa të menjëhershme të bëra pas debatit të së martës treguan se votuesit mendonin se Harris kishte performuar më mirë se kundërshtari i saj republikan.
Trump shtoi se Harris duhet të përqendrohet në punën e saj si zv/presidente.
Pak më vonë, në një tubim në Karolinën e Veriut, Harris u përgjigj duke thënë se ata "i detyrohen" votuesve një debat tjetër sepse "ajo që është në rrezik nuk mund të jetë më e rëndësishme." Anketat sugjerojnë se të dy kandidatët janë në një garë jashtëzakonisht të ngushtë me vetëm dy muaj para zgjedhjeve. Të dy e shpallën veten fitues pas debatit 90-minutësh të së martës në ABC News, ku Harris e nervozoi Trump me një seri sulmesh personale që e vendosën atë në mbrojtje. Këto përfshinin komente për madhësinë e turmave në tubimet e tij dhe sjelljen e tij gjatë trazirave në Kapitol më 6 janar 2021.
Trump dhe mbështetësit e tij që atëherë kanë akuzuar dy gazetarët e ABC që moderuan debatin për njëanshmëri dhe mbështetje për Harris. Të enjten ai tha se nuk kishte nevojë për një debat tjetër.
