Pas dekadash pa dhunë politike të drejtuar ndaj një kandidati presidencialë, SHBA-ja tani ka përjetuar episode të tilla, dy herë brenda dy muajsh. Në të dyja herët, shënjestër ka qenë Donald Trump.
Në mesin e korrikut, ai shpëtoi mrekullisht teksa u qëllua në vesh, nga një person i armatosur në një tubim në Butler, Pensilvani. Sulmuesi 20-vjeçar u qëllua për vdekje nga një snajper.
Dy muaj më vonë, të dielën pasdite, gjatë një loje golfi, ai ishte objektivi i dukshëm i një tjetër vrasësi të mundshëm, sipas FBI-së. Atentatori është për momentin në paraburgim.
Hetuesit thanë se një burrë i armatosur me një pushkë të stilit AK-47 po priste në shkurre ndërsa Trump luante në fushën e tij të golfit në Ëest Palm Beach përpara se sulmuesi të dallohej nga agjentët e Shërbimit Sekret, të cilët hapën zjarr.
Amerikanëve u është dashur të përshtaten me “normalet e reja” në politikë.
Diskursi kombëtar është ashpërsuar, ndarjet anë mprehur dhe janë bërë më të rrënjosura dhe standardet për sjelljen e kandidatëve, janë zvogëluar.
Duke pasur parasysh epideminë kombëtare të dhunës me armë, këto lloj sulmesh janë ndoshta një tjetër normalitet i ri, i pashmangshëm. Por tani për tani, është ende tronditëse.
“Dhuna nuk ka vend në Amerikë”, tha zëvendëspresidentja Kamala Harris – e cila është gjithashtu kundërshtarja demokrate e Trump në këto zgjedhje – në një deklaratë pas incidentit në Florida.
Detajet e tentativës së dukshme për vrasje – identiteti dhe motivimi i sulmuesit në veçanti – do të përcaktojnë përfundimisht ndikimin që kjo ka në politikën amerikane. Por, për momentin, duket sikur – pavarësisht komenteve të zëvendëspresidenttes – kjo lloj dhune është gjithnjë e më shumë pjesë e Amerikës së sotme.
Donald Trump, në deklaratën e tij të parë pas tentativës së dukshme për vrasje, premtoi se asgjë nuk do ta ngadalësonte ose do ta bënte të dorëzohej.
Retorika e tij pas atentatit të parë i drejtohej amerikanëve, “luftoni, luftoni, luftoni. Ata nuk po vijnë pas meje, po vijnë pas jush”, i pëlqen të thotë Trump.
Tani ish-presidenti ka një shembull tjetër dramatik që mund ta përdorë për të ilustruar pikëpamjen e tij.
Megjithatë, ky incident i fundit mund të mos ketë peshën emocionale si të shtënat në Butler, Pensilvani.
Ai sulm ndodhi në një tubim publik, në sy të kamerave televizive, me ish-presidentin që u gjakos. Një mbështetës u vra dhe dy të tjerë u plagosën.
Këtë herë, incidenti ndodhi në një fushë golfi në pronësi të Trump, me ish-presidentin larg nga rreziku. Pa imazhe grafike për t’u riprodhuar për ditë të tëra, mund të ndikojë në atë se sa shumë ndikim do të ketë ngjarja në ndërgjegjen e publikut.
