Ministri i Jashtëm i Serbisë, Marko Gjuriq, zhvilloi dje një vizitë zyrtare në Estoni, e para vizitë e një ministri serb në Talin pas 14 vitesh, shkruan Gazeta Express. Megjithatë, qëndrimi i Serbisë dhe afërsia e saj me Rusinë e Vladimir Putinit nuk kanë kaluar pa u përmendur dhe kritikuar nga kryediplomati estonez, Margus Tsahkna.
“Është e papranueshme të shtrëngosh duart me një kriminel lufte që është duke rrezikuar sigurinë e Evropës dhe sovranitetin e Ukrainës,” shkroi kryediplomati estonez në deklaratën e tij pas takimit zyrtar me Gjuriqin.
Ndërkohë, në njoftimin e tij për takimin, Gjuriq nuk përmendi kritikën e ashpër të Tsahkna për takimet e zëvendëskryeministrit serb, Aleksander Vulin, me Vladimir Putinin. Në vend të kësaj, diplomati serb u fokusua në ankesat për Veriun e Kosovës dhe veprimet e "njëanshme dhe të pakoordinuara të regjimit të Kurtit".
