Detaje të reja kanë dalë në dritë nga tragjedia e ndodhur në fshatin Domen të Postribës, ku humbën jetën 24-vjeçarja Bleona Çelaj dhe dy fëmijët e saj të mitur, të moshës 1 dhe 4 vjeç.
Burime nga grupi hetimor bëjnë me dije se në vendngjarje janë gjetur një bombol gazi dhe një shishe me benzinë. Sipas të dhënave paraprake, në banesën që u shkrumbua nga flakët dyshohet të kenë ndodhur edhe shpërthime, ndërsa ekspertët po punojnë për të përcaktuar shkakun e saktë të zjarrit.
Mësohet se 24-vjeçarja dhe dy fëmijët ishin kthyer së fundmi nga Gjermania dhe kishin shkuar në banesën e vjetër të familjes në fshatin Domen.
Ndërhyrja e forcave zjarrfikëse është vështirësuar për shkak të terrenit të thyer, pasi banesa ndodhet rreth 30 minuta në këmbë larg rrugës kryesore. Kur ekipet e emergjencës mbërritën në vendngjarje, flakët kishin përfshirë plotësisht banesën.
Grupi hetimor vijon veprimet për zbardhjen e plotë të dinamikës së ngjarjes. Deri më tani, hetimet janë përqendruar në pistën e një zjarri aksidental, pa përjashtuar as pista të tjera që mund të ndihmojnë në sqarimin e rrethanave të kësaj tragjedie.
