Gazment Bardhi ka denoncuar sot në një mesazh të mbërritur në aplikacionin Signal, duke iu referuar një bisede të dyshuar mes dy eksponentëve të botës së krimit, ku përmendet dhe emri i tij.
Me të drejtë, kryetari i grupit parlamentar të PD-së shpreh shqetësimin se makinacione të tilla mund të përdoren nga mazhoranca për ta sulmuar politikisht. VNA i hodhi një sy mesazheve për të cilat foli zoti Bardhi, dhe nuk përjashtohet mundësia që ato të jenë një produkt i inteligjencës artificiale. Në botën e sofistikuar të teknologjisë, tashmë nuk është e vështirë të prodhohet një bisedë e tillë. Në rrjet qarkullojnë video ku IA ka gjeneruar zë, video dhe foto të personazheve publikë, duke stisur biseda dhe ngjarje që nuk kanë ekzistuar në realitet.
Gjithashtu, një tjetër problem në Shqipëri mbetet përdorimi i copëzave nga dosjet e rëndësishme për të shantazhuar grupet rivale të krimit apo persona me pushtet ekonomik apo politik. Vetë kryetari i grupit parlamentar të PD-së përmendi pak javë më parë në një seancë plenare emrin “Mondi,” të marrë nga një dosje e hetimit të SPAK, duke iu referuar drejtorit aktual të Policisë së Shkodrës.
Fakti mbetet se përdorime të tilla janë të rrezikshme, sidomos në realitetin shqiptar, ku propaganda dhe hapësira që ajo gjen në median tradicionale shërben si një armë e fuqishme për pushtetin e Edi Ramës. Rasti i fundit me deputetin Gazment Bardhi është një precedent i rrezikshëm, për të cilin duhet të reagojnë organet përkatëse dhe jo vetëm. Me afrimin e fushatës për zgjedhjet e ardhshme, metoda të tilla mund të përdoren gjerësisht nga kundërshtarët politikë për të sulmuar dhe delegjitimuar akuzat ndaj qeverisë.
