Sali Berisha foli sot për më shumë se 30 minuta lidhur me burgosjen e Ervin Salianjit. Në mbledhjen e paralajmëruar të Këshillit Kombëtar, kryetari demokrat renditi si zakonisht akuzat ndaj qeverisë dhe SPAK-ut, duke u bërë thirrje shqiptarëve që të reflektojnë dhe të bashkohen me opozitën për të udhëhequr një revoltë popullore.
"Do të kalojmë në sulm," tha Berisha, duke shtuar se me revoltën e tyre, mund të paralizojnë Edi Ramën kudo nëpër Shqipëri. Sipas tij, mosbindja civile është mënyra më e mirë për këtë sulm, dhe mijëra shqiptarë janë gati të marrin orientimin nga drejtuesit e opozitës. Ai theksoi se duhet të paralizohet qeveria deri në vendosjen e një qeverie teknike, pasi vetëm kështu Shqipëria mund të rikthehet në rrugën e ligjit.
Këshilli Kombëtar më pas votoi pro propozimit të kryesisë për zhvillimin e një proteste më 7 tetor. Edi Paloka njoftoi para demokratëve se thirrja për qytetarët është të protestojnë duke filluar nga Kryeministria dhe më pas në të gjitha rrugët e kryeqytetit. Ndërkohë, pritet të ketë edhe bllokime të seancave parlamentare, ngjashëm me protestat e "flakadanëve" të një viti më parë.
