Deputeti i PD Ervin Salianji, ka reaguar pasi janë bërë 24 orë nga momenti kur u transferua në burgun e Fierit, për të vuajtur dënimin me një vit burg të caktuar nga Gjykata e Apelit për kallëzim të rremë.
Përmes një postimi në facebook, Salianji shprehet se mbështetja dhe forca që ka marrë kanë qenë të jashtëzakonshme. Salianji shprehet se vendi është në luftë ndaj së keqes (duke iu referuar maxhorancës), duke thënë se Shqipëria do çlirohet nga regjimi.
“Miqtë e mi, mbështetja dhe forca që më keni dhënë në këto 24 orë ka qenë e jashtëzakonshme! Dua t’ju siguroj se kam gjithë energjitë për të dal triumfues dhe për t’u bashkuar me ju në luftë ndaj të keqes që mban mbërthyer këtë vend prej 11 vitesh! Falenderime nga zemra”, shkruan Salianji në rrjetet sociale.
