Sali Berisha e ka quajtur historike rezolutën e sotme të miratuar nga organizata më e madhe e partive politike të qendrës së djathtë në botë, IDC-CDI, e cila bën bashkë 109 parti politike të qendrës e qendrës së djathtë nga e gjithë bota, në mbledhjen e Komitetit Ekzekutiv të zhvilluar në Siem Reap të Kamboxhias.
Në këtë rezolutë, sipas Albana Vokshit dhe Belind Këlliçit, që kanë qenë pjesëmarrës, është miratuar një rezolutë ku dënohet masa e arrestit me burg për Sali Berishën, burgosja e Ilir Metës, gjyqi politik ndaj Mediut, madje dhe çështja Beleri. E gjitha mund të jetë e vërtetë, ndonëse në faqen zyrtare të kësaj organizate nuk ka të publikuar asnjë deklaratë apo rezolutë. Publikimi i fundit është në datën 17 tetor. Por më interesantja është që IDC-CDI njeh ende si kryetar të PD-së Lulzim Bashën. Të paktën kështu shkruhet në faqen zyrtare të kësaj organizate, që mesa duket Albana dhe Belindi nuk e kanë njoftuar për ndryshimet e marra nga gjykatat e Edi Ramës, të njëjtat që kanë dënuar dhe liderin e opozitës.
Gjithsesi, entuziazmi mund të jetë legjitim, për sa kohë të shkosh deri në Kamboxhia dhe të mos ndryshosh dot emrin e Bashës si kryetar partie nuk është drama më e madhe e PD-së sot.
