Brunilda Kadi është zgjedhur anëtare e Këshillit të Lartë Gjyqësor (KLGJ), si përfaqësuese e gjyqtarëve të gjykatave të shkallës së parë.
Zgjedhja u bë këtë të premte, më 25 shtator 2026, gjatë Mbledhjes së Përgjithshme të Gjyqtarëve, ku u zhvillua votimi për tre anëtarët e rinj të Këshillit të Lartë Gjyqësor.
Kadi, gjyqtare pranë Gjykatës së Shkallës së Parë të Juridiksionit të Përgjithshëm Tiranë, ishte në garë për vendin që u takon gjykatave të shkallës së parë, së bashku me gjyqtaret Matilda Llangozi dhe Manjola Xhaxho.
Pas procesit të votimit, Brunilda Kadi rezultoi fituese e garës, duke siguruar mandatin në organin kushtetues që administron sistemin gjyqësor në vend.
Për Kadin, zgjedhja në KLGJ shënon një rikthim në këtë institucion. Ajo ka qenë edhe më parë anëtare e Këshillit të Lartë Gjyqësor, pasi ishte zgjedhur në dhjetor të vitit 2018 si përfaqësuese e gjykatave të shkallës së parë.
Zgjedhjet e 25 shtatorit u zhvilluan për plotësimin e tre vendeve në KLGJ: një përfaqësues nga gjykatat e shkallës së parë, një nga gjykatat e apelit dhe një nga Gjykata e Lartë.
