Sali Berisha ka zhvilluar sot një takim virtual me mbështetës të PD-së në diasporë, ku ka ripërsëritur premtimin se në qeverinë e tij Bitcoin apo monedhat virtuale do të jenë të përdorura lirisht.
“Programi ynë parashikon Bitcoinin, Blockchain-in dhe, natyrisht, formalizim dhe legalizim sipas rregullave më transparente. Sot kjo monedhë në Shqipëri është në duart e klaneve qeveritare dhe klaneve mafioze,” tha Berisha, duke shtuar se ka “klane mafioze që nga strofullat e tyre i kërkojnë Ramës t’ua japë atyre monopolin e Bitcoin-it.”
Kryetari i PD-së nuk përcaktoi se cilat janë këto klane mafioze, por sipas tij, kur ai të vijë në pushtet, “Bitcoin do të jetë një monedhë e përdorur lirisht, natyrisht në transparencë dhe sipas rregullave të përcaktuara nga autoritetet e mbikëqyrjes financiare të kriptomonedhave, një autoritet që do të ngrihet për këtë qëllim.”
Kjo nuk është hera e parë që kreu i PD-së ngre çështjen e përdorimit të kriptomonedhave, një aktivitet ende pak i njohur në Shqipëri, ku një pjesë e madhe e transaksioneve financiare kryhen ende me para në dorë.
Sali Berisha foli sot me emigrantë shqiptarë të shpërndarë në vende të ndryshme të botës, duke u kërkuar atyre të regjistrohen dhe të votojnë në zgjedhjet parlamentare të 11 majit.
