Tornado të fuqishme kanë goditur Siçilinë perëndimore në Itali, duke shkaktuar të paktën 11 të plagosur, mes tyre edhe fëmijë, si dhe dëme të konsiderueshme në banesa, shkolla, automjete dhe toka bujqësore. Fenomeni ekstrem u regjistrua të premten, më 9 tetor, në zonat e Marsalës dhe Petrosinos, në provincën e Trapanit.
Dy vorbulla të fuqishme u formuan fillimisht mbi det, pranë portit të Marsalës, përpara se të lëviznin drejt tokës. Erërat e forta dëmtuan ndërtesa, shkulën çati dhe rrëzuan mure, duke shkaktuar panik mes banorëve.
Një nga incidentet më të rënda u regjistrua në Petrosino, ku një automjet u godit nga tornadoja dhe përfundoi në një përrua. Dy personat që ndodheshin brenda tij mbetën të plagosur dhe u transportuan në spital.
Mes të lënduarve është edhe një 70-vjeçar, i cili pësoi fraktura të shumta dhe u dërgua për trajtim të specializuar në Palermo. Ndërkohë, në spitalin e Marsalës morën ndihmë mjekësore katër fëmijë dhe pesë të rritur.
Dëme të rënda pësoi edhe shkolla “Alcide De Gasperi”, ku në momentin e goditjes ndodheshin 273 nxënës. Ndërtesa u shpall e papërdorshme, ndërsa autoritetet po kërkojnë ambiente alternative për zhvillimin e mësimit.
Sipas mediave italiane, të paktën pesë banesa janë shkatërruar, ndërsa 11 familje janë detyruar të largohen nga shtëpitë e tyre për shkak të dëmtimeve. Era e fuqishme ka goditur gjithashtu sera, vreshta dhe biznese lokale, duke shkaktuar humbje të konsiderueshme ekonomike.
Presidenti i rajonit të Siçilisë, Renato Schifani, njoftoi angazhimin e autoriteteve për përballimin e emergjencës dhe vlerësimin e dëmeve. Ekipet e mbrojtjes civile po punojnë për të garantuar sigurinë e banorëve dhe për të ndihmuar familjet e prekura.
Autoritetet italiane vijojnë evidentimin e pasojave të motit ekstrem, ndërsa pritet të përcaktohet edhe vlera e dëmeve materiale të shkaktuara nga tornadot.
