Thirrjet “Rama në burg, Berisha në burg”, u dëgjuan sërish në protestën e djeshme, duke shkaktuar edhe përplasje mes të rinjve protestues dhe mbështetësve të opozitës.
Në një komunikimi online me ndjekësit në rrjetet sociale, kreu i PD, ka akuzuar organizatorët e protestave paqësore se janë të paguar nga kryeministri Edi Rama dhe se po përpiqen të pengojnë mobilizimin e opozitës.
Berisha iu rikthye protestave të mëparshme, duke i cilësuar ato si një projekt politik që, sipas tij, synonte të largonte qytetarët nga opozita dhe të dobësonte përpjekjet për rrëzimin e qeverisë.
“Beteja në politike behet në rrafshin psikologjik. Poseduesit e megafonëve të paguar dolën me sloganin ‘Rama në burg, Berisha në burg’ ose ‘opozitë e shitur’. Armë kjo, për ata që kanë ABC-në e propagandës, e një qeverie që përpiqet të mbulojë krimet dhe vjedhjet”, u shpreh Berisha.
Kreu demokrat përdori edhe termin “flamingot”, duke pretenduar se qëndrimet e tyre kanë ndikuar në dobësimin e protestave kundër qeverisë.
“Flamingot prishën protestën, sepse mbështetësit e opozitës nuk i bashkoheshin. Thonin: ‘Kë do të votoj në rast se ikën Rama?’. Ky projekt është piramida më e madhe e mashtrimit në historinë e Shqipërisë”, deklaroi ai.
