Deputetja e Partisë Demokratike, Jorida Tabaku, ka akuzuar partitë e vogla politike se stimulojnë thirrjet kundër Sali Berishës gjatë protestave qytetare, me qëllim për të fituar protagonizëm politik.
Në një intervistë për News24, Tabaku komentoi parullën “Rama në burg, Berisha në burg”, e cila është dëgjuar gjatë protestave të fundit, duke deklaruar se jo të gjitha këto thirrje janë spontane.
“Jo të gjitha këto thirrje janë organike. Ka forca të vogla politike që i stimulojnë. Mund të ketë edhe qytetarë, mund të mos iu pëlqej edhe unë”, deklaroi ajo.
Sipas Tabakut, debati për drejtimin e Partisë Demokratike është mbyllur, pasi Berisha është zgjedhur dy herë kryetar gjatë katër viteve të fundit. Ajo theksoi se drejtuesin e një partie e zgjedhin anëtarët dhe jo protestuesit në shesh.
Megjithatë, deputetja demokrate bëri thirrje për bashkimin e të gjitha forcave opozitare, përfshirë edhe partitë e vogla që, sipas saj, stimulojnë thirrjet kundër Berishës.
“Secila prej partive, duke nisur nga PD si më e madhja, në këtë moment ndoshta mund të humbë pak nga vetja duke shtrirë dorën edhe për koalicione jo tradicionale, me parti që nuk kemi menduar njësoj”, u shpreh Tabaku.
Ajo këmbënguli se largimi i Edi Ramës nga pushteti mund të arrihet vetëm përmes bashkimit të çdo faktori opozitar.
