Kryetari i Partisë Demokratike, Sali Berisha, ka ndryshuar vendin ku do të zhvillojë takimin me komunitetin shqiptaro-amerikan në New Jersey, vetëm pak ditë pasi disa emigrantë paralajmëruan organizimin e një proteste në të njëjtën ditë.
Fillimisht, Berisha kishte njoftuar se takimi me shqiptarët e Amerikës do të mbahej të dielën, më 6 shtator, në orën 11:00, në Bergen Performing Arts Center, në Englewood të New Jersey-t. Por, sipas njoftimit të fundit, aktiviteti është zhvendosur në ambientet e “Venetian Palace” në New Jersey, ndërsa është ndryshuar edhe ora, duke u përcaktuar për në 10:00 sipas orës lokale, ose 16:00 me orën e Tiranës.
Ndryshimi i vendit dhe orarit vjen pasi një grup emigrantësh shqiptarë në SHBA kishte paralajmëruar një protestë kundër kreut të PD-së, pikërisht në ditën e takimit të tij me komunitetin shqiptar.
Përmes një postimi në Instagram, organizatorët kishin bërë publike thirrjen për tubim, duke përdorur edhe sloganin “Berisha non-grata, Berisha në burg”.
Për momentin nuk ka janë dhënë arsyet për zhvendosjen e aktivitetit. Megjithatë, koha kur është marrë vendimi për ndryshimin e vendit ngre pikëpyetje nëse lëvizja synon të shmangë përballjen me protestuesit që kishin paralajmëruar praninë e tyre pranë aktivitetit.
Vizita në SHBA ka një rëndësi të veçantë politike për Berishën, pasi është udhëtimi i tij i parë atje pas heqjes së kufizimit për hyrjen në territorin amerikan. Takimi me diasporën është promovuar prej tij nën sloganin “Freedom Works”.
