Kryetari i PD, Sali Berisha, ka zhvilluar një takim me drejtuesit dhe të deleguarit e qarkut të Tiranës. Por në vend të diskutimit për fushatën, Berisha zgjodhi që në nisje të takimit të fliste për dekretet e Presidentit amerikan Donald Trump, të cilat sipas tij nuk i shërbejnë vetëm SHBA-së, por edhe Shqipërisë.
“Të dashur miq, ndryshime të mëdha, të jashtëzakonshme kanë ndodhur këto ditë në timonin e Shtëpisë së Bardhë me inaugurimin e presidentit Donald Trump, në rikthimin më të fuqishëm dhe më të jashtëzakonshëm në historinë e njerëzimit me votën e lirë.
Këto qëndrime janë të një rëndësie të jashtëzakonshme jo vetëm për SHBA. Por u garantoj se pas SHBA, kopshti eksperimental i doktrinës kriminale të Xhorxh Sorosit më shumë se çdo vend tjetër ishte Shqipëria” - u shpreh Berisha në fjalën e tij.
Më tej, kreu i PD vijoi me komentet për foton e kryeministrit Edi Rama me Alex Soros, ndërsa paralajmëroi këtë të fundit që të largohej me fondacionin e tij nga Shqipëria para zgjedhjeve, ose ndryshe ai do ta mbyllte pas zgjedhjeve të 11 majit.
“Sot ishte me Aleksis Soros, po foton e tij nuk e kishte publikuar, Aleksis po, Rama jo. Megjithatë unë shfrytëzoj këtë rast t’i kërkoj publikisht Aleksis Soros të konsiderojë mbylljen e Fondacionit të Hapur në Tiranë për veprimtarinë e tij anti-opozitë dhe ta garantoj se një nga dekretet e para të Sali Berishës do të jetë mbyllja e tij pas zgjedhjeve të 11 majit” – u shpreh Berisha.
Kryedemokrati gjithashtu foli për kryetarin e Bashkisë së Tiranës, Erion Veliaj, për të cilin tha se Veliaj bleu biletë 150 mijë euro për të shkuar në inaugurimin e presidentit Trump në SHBA.
“I plagosur për vdekje politikisht, numri 2 i kësaj partie, sillet si kufomë politike në Europë dhe SHBA, hapi fjalë dhe jo vetëm hapi fjalë ç’është e vërtetë, por u morën edhe bileta 150 mijë euro, por përfundoi në një festë me ndihmën e personit të vetëm që njoh unë dhe që është tradhtar i kombit grek dhe kombit shqiptar dhe që quhet Vangjel Tavo” – tha Berisha.
Pra, për rreth 45 minuta Berisha mblodhi drejtuesit politikë të Tiranës për t’u folur për politikat e Trump, rrezikun e Sorosit dhe hallin e Veliajt, por për Tiranën nuk tha asgjë.
.
