Kryetari i Partisë Demokratike, Sali Berisha, në emisionin “Debat” në A2 CNN ka folur për zotimin publik se kur të vij në pushtet do të shkrij SPAK-un. Berisha tha se nëse do të pranonte një prokurori politike, atëherë ai do të tradhtonte opozitarizmin.
“Nëqoftëse unë do pranoja këtë Prokurori siç është unë do isha një tradhtar, më i madhi në historinë e opozitarizmit në Shqipëri. Unë kam këtu tre rezoluta ndërkombëtare. Të cilat damkosin SPAK-un si prokurori politike. Nëse unë si opozitar do pranoja një prokurori politike, unë do pranoja një gjëmë të madhe për vendin tim” - tha Berisha.
Qasja e kreut të PD që t’i veshi arsyen e opozitarizmit aksionit të tij anti-SPAK, nuk qëndron aspak. Kjo për faktin se sondazhet kanë treguar që Prokuroria e Posaçme është institucioni më i besueshëm në Shqipëri. Dhe dhe nëse do i referohemi sondazhit më të fundit, i publikuar nga Instituti Ndërkombëtar Republikan, besueshmëria e qytetarëve ndaj SPAK shkon në 76%.
Prandaj, një kandidat për kryeministër që kërkon të përfaqësojë të pakënaqurit dhe të rrëzojë qeverinë që ka më shumë të arrestuar nga SPAK, më e pakta që mund të bëjë është ta mbështesë institucionin më të besueshëm nga qytetarët. Çdo deklaratë kundër tij, është firo në votat elektorale.
