SPAK ka publikuar strategjinë e hetimit dhe parandalimit të krimit zgjedhor në zgjedhjet e 11 majit. Në njoftimin për mediat, Prokuroria e Posaçme thotë se pikat kryesor ku do të bazohet strategjia, do të jetë verifikimi në terren të indicieve apo fakteve dhe raportimin e dyshimeve rreth kryerjes së veprave penale, monitorimin e mediave për indicie të tilla, si dhe do të ketë bashkëpunim me disa institucione të tjera në vend.
“Prokuroria e Posaçme publikon “Strategjinë e Hetimit dhe Parandalimit të Krimit Zgjedhor: Zgjedhjet për Kuvendin 2025”, e cila mbështetet në:
Verifikimin në terren të indicieve apo fakteve rreth kryerjes së veprave penale në kuadër të zgjedhjeve për Kuvendin 2025, nën juridiksionin e Prokurorisë së Posaçme.
Verifikimin e raportimeve që ngrenë dyshime të arsyeshme mbi keqpërdorimin e buxhetit dhe investimeve publike gjatë periudhës zgjedhore prej subjekteve të posaçme.
Monitorimin e mediave dhe rrjeteve sociale për indicie të mundshme në kryerjen e veprave penale në kuadër të zgjedhjeve.
Bashkëpunimin ndërinstitucional me Prokurorinë e Përgjithshme, Komisionin Qendror të Zgjedhjeve, Policinë e Shtetit, organizmat ndërkombëtare, organizatat e shoqërisë civile që monitorojnë proceset zgjedhore, etj” – thuhet ndër të tjera në njoftim.
Marrja e masave tregon edhe njëherë seriozitetin e SPAK për rolin që do të ketë në zgjedhjet e ardhshme. Madje, publikimi i strategjisë ditën e sotme, shihet edhe si një përgjigje ndaj kryeministrit Rama, i cili mëngjesin e sotëm në rubrikën “sy më sy” i parapriu kësaj duke thënë se survejimi i partive politike në zgjedhje është lajthitje.
“Patjetër që duhet të jemi të vendosur, nuk mund të trysnohet administrata, nuk mund të survejohen partitë politike në proces elektoral. Besoj se është lajthitje e momentit dhe të ndalet menjëherë survejimi në terren” – tha Rama.
Mesa duket as SPAK nuk e ka ndërmend të survejoj asnjë forcë politikë, por vetëm do të verifikojë denoncimet dhe raportimet për vepra penale, si një e drejtë dhe detyrim kushtetues që gëzon.
