Gjyqtari i Apelit të Posaçëm, Engert Pëllumbi, i cili firmosi masën e sigurisë për ish-kryeministrin Sali Berisha, ka refuzuar kërkesën e Ajola Xoxës dhe kompanisë së saj për kthimin e sendeve të sekuestruara. Xoxa, bashkëshortja e kryebashkiakut të Tiranës, Erion Veliaj, kërkonte rikthimin e telefonit të sekuestruar, kontratave, dokumenteve dhe një shume parash të gjetura në studion e saj ligjore, Partners Law. Këto sende u sekuestruan nga hetuesit e BKH-së gjatë kontrollit të kryer më 6 dhjetor 2024. Pas shqyrtimit të kërkesës, gjyqtari Pëllumbi vendosi ta rrëzojë atë. Ajola Xoxa dhe Erion Veliaj po hetohen nga SPAK për korrupsion dhe pastrim parash, së bashku me gjashtë biznesmenë të tjerë të dyshuar për lidhje klienteliste, të cilët përfitonin tendera dhe leje ndërtimi. Vendimi Në vendimin e saj, gjykata ka miratuar vendimin nr. 736, datë 20.12.2024 të Gjykatës së Posaçme të Shkallës së Parë, duke lënë të pandryshuar masën e sekuestrimit të sendeve të përfshira në çështje. Ky vendim i apelimit ka konfirmuar atë të mëparshmin, duke e lënë në fuqi ndalimin e kthimit të sendeve të sekuestruara. “Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtari Engert Pëllumbi, sot më 19.02.2025, shpalli vendimin mbi çështjen penale nr. 53, datë 12.02.2025 regjistrimi, regjistruar mbi ankimin e ankuesve A.X., Shoqëria Tregtare “***” sh.p.k., me objekt: “Ankim ndaj vendimit nr. 736, datë 20.12.2024 të Gjykatës së Posaçme të Shkallës së Parë për Korrupsionin dhe Krimin e Organizuar, lidhur me kundërshtimin e vendimit për sekuestrimin e sendeve”, dhe vendosi: Miratimin e vendimit nr. 736, datë 20.12.2024 të Gjykatës së Posaçme të Shkallës së Parë për Korrupsionin e Krimin e Organizuar.Kundër këtij vendimi mund të bëhet rekurs në gjykatën e Lartë brenda 45 ditëve nga e nesërmja e njoftimit të tij”, thuhet në njoftim.
