Sot ka përfunduar afati që Partia Demokratike kishte vebdosur për dorëzimin e kandidaturave për garën e primareve. Burime bëjnë me dije se kanë dorëzuar kërkesën 300 kandidatë për t'u futur në primare. Komisioni i Zgjedhjeve në selinë blu do mblidhet për të shqyrtuar kandidaturat sa i takon aspektit formal të dokumentacionit. Në vijim pritet të mblidhet kryesia për të miratuar listën e kandidaturave për primare. Nga kjo garë është tërhequr Helidon Bushati i cili ka njoftuar se nuk do të kandidojë.
"Personalisht, kam zgjedhur të mos mos marr pjesë në primare dhe si rrjedhojë heq dorë nga aspirata për të qenë kandidat për deputet. Ky nuk është thjeshtë një vendim personal, është një akt përgjegjësie politike dhe morale. Gjithsesi, ky vendim nuk do të thotë tërheqje nga rrugëtimi ynë i përbashkët. Përkundrazi, do të jem aty ku kam qenë gjithmonë, pranë Partisë Demokratike dhe demokratëve"- shkruan Bushati në rrjetet sociale.
Helidon Bushati në vitin 2017, hoqi dorë nga lista fituese e Partisë Demokratike për qarkun Shkodër për maksimalizimin e rezultatit në zgjedhje.
Në vitin 2022, hoqi dorë nga drejtimi politik i qarkut Shkodër, në përpjekje për të mbajtur të bashkuar PD-në.
Ndërsa tani hoqi dorë nga kandidimi për deputet, sikurse shkruan, për t'i hapur rrugën të rinjve dhe krijuar më shumë mundësi për fitore.
