Banorët e Hotolishtit kanë bllokuar sot segmentin rrugor që kalon nëpër fshat, për të protestuar kundër mungesës së transparencës lidhur me projektin e aksit Elbasan–Qafë Thanë. Ata kërkojnë një sqarim të menjëhershëm për rrugën, që, sipas tyre, në variantin aktual parashikon shembjen e rreth 30 shtëpive. Banorët propozojnë ndërtimin e një tuneli, që do të kishte ndikim minimal në jetën e komunitetit dhe mjedisin përreth.
Një tjetër shqetësim i protestuesve është kompensimi i ofruar nga shteti, i cili, sipas tyre, është i pamjaftueshëm për të rindërtuar banesat e tyre. Ata gjithashtu kritikon çmimin aktual të kompensimit të tokave prej 174 lekësh për metër katror, që e konsiderojnë të papranueshëm.
Zemërimi i banorëve është drejtuar gjithashtu ndaj zv/kryeministres dhe ministres së Infrastrukturës, Belinda Balluku. Banorët shprehen të zhgënjyer që Balluku nuk ka pranuar të takojë ata këtë të martë, edhe pse ishte paralajmëruar një vizitë nga ana e saj. Një banor e quajti veprimin e ministres si një "absurditet të madh", duke theksuar se ajo nuk mori mundësinë të sqarojë situatën për banorët. Protestuesit kërcënuan me bojkot të zgjedhjeve të 11 majit, nëse nuk merret një vendim i drejtë dhe transparent për këtë projekt.
